GKLI RESORT DOLOK SANGGUL 1: EVANGELIUM MINGGU, 27 September 2020 " MATEUS 21 : 23 - 32 "

> JAMITA MINGGU, 27 September 2020           Mateus 21 : 23 - 32 (Tafsiran Jamita)

Patujolo:

Hinorhon ni nasai lam torop jolma mangihuthon Jesus dohot angka halongangan napinatupaNa, godang ma nang na lam manghasogohon Ibana, isarana angka siboto Surat dohot angka sintua ni malim. Alanima asa sai dilului nasida dalan laho manegai ulaon ni Jesus dohot naeng  manangkup Ibana, termasuk mai mambahen jorgong/jebakan marhite angka sungkun-sungkun. Diantusi nasida do nian natarsurat I, diboto do manghatahon, bahkan mangajari do nasida taringot tu ulaon nadenggan, alai nasida sandiri ndang mangulahon ulaon nadenggan, dihukkupi do angka ulaonna marhite jabatan ndang olo nasida bertobat.

    Alani ma marhite Jamita on, di podahon tu Hita saluhutna, marhite :

" Tema :  Namangulahon Lomo Ni Roha Ni Debata,  Ido Na Bongot Tu Harajaon Ni                            Debata"

 

I. Ndada Holan Hata, Ikkon Tarida Sian Parniulaan.

· Dibona ni ayat on, taida do cara ni angka Sintua ni malim laho manegai ulaon ni Jesus, na manukkun taringot huaso na pinagasahon ni Jesus. Ala ndang dihaporseai nasida Tuhan Jesus I do Mesias na ro sian Banua Ginjang, makana ragu nasida di huaso ni Jesus. Alai naeng ma tangkas botoonta, anggo Huaso napinangasahon ni Tuhan Jesus, ima huaso Sian Banua ginjang na sian Ama I, ala nasinuru ni Ama I do Ibana. Sian Banua Ginjang.

· Laho mangalusi sungkun-sungku I, dipasahat ma tu nasida sungkun sungkun taringot tu huaso ni si Johannes, alai ipe dang diboto nasida, ima umbahen dang dialusi Jesus sungkun sungkun nasida i. Diboto Jesus do naung di olohon angka sintua ni Malim I ikkon mangula di porlak ni Debata, alai ditingki ro si Johannes manjamitahon hamubaon ni roha, ndang olo nasida paubahon rohanasida, alai anggo angka pardosa I, ima angka sijalo beo dohot angka boruboru pardosa I , disolsoli do rohana laho paubahon roha.

· Mar-umpama do Tuhan Jesus laho mangalehon panorangion taringot tu : ngolu na sisongon dia do dihalomohon Debata?. Dipartudos doi tu sada ama namarsuru 2 ianakhonna laho mangula di porlakNa. Nasada mangolohon alai ndang lao, nasadanari ndang mangolohon alai lao do ibana mangulahon nasinuru ni Amanai.

a. Godang do jolma mangolohon alai dang diulahon, godang do jolma umbege hata ni Debata,  godang do namalo manghatahon hatai, dohot namandok nauli do hata i. Alai ndang piga na setia mangulahonsa. Godang do na olo ro marminggu, alai ndang diboto tujuan nasasintong na ro tu bagas joro ni Debata, dietong rohana do nungga cukkup molo ro holan marminggu, marende, dohot pasahat pelean, hape ndang I ngolu ni halak Kristen na sasintongna, alai tarlumobi tahe mangulahon lomo ni roha ni Debata, angka dia mai : Jesus ma dipangasahon di nasa ulaonna, mangolu dibagasan hatigoran, dibagasan holong ni roha, marhadaulaton, mangulahon hata ni Debata, dohot angkka naasing dope.

b. Namangolohon ulaon I alai ndang lao, on ma na holan mambege hata ni Debata, na holan  manghatahon. Tudos mai tu anak sianggian I, namangolohon parenta ni Amana, alai ndang lao mangulahon, sisongonon pen dang dihalomohon Debata.

· Didok di Mateus 7 : 21 “Ndada saluhut halak, na mandok Ahu Tuhanna, bongot sogot tu harajaon banua ginjang i, holan angka na mangulahon lomo ni roha ni Damang na di banua ginjang i do!”. Nungga lam tangkas be dihita, ia so angka namangulahon lomo ni roha ni Debata, ndang tarbahensa bongot tu harajaon ni Debata. Taboto do Haporseaon do dalan malua, alai anggo haporseaon ipe dang ndang adong pangulaonna doshon naung mate do hadiriona ( Yakobus 2:17)

 

II. Lomo ni roha ni Debata ima Hamubaon ni Roha/Panolsolion

· disuru do anak siahaan I tu porlakna alai alusna mandok” ndang olo ahu”, molo umbege alus on boi do ro rimas ni namarsuru alani naso olo mangoloi aturanna. Ndang dipaksa jala ndang diuhum ibana alani alusnai, ai bebas do anaknai mangalehon alusna. Alai molo tajaha di ayat 29 didok ” hape disolsoli do rohana muse gabe saut ma ibana laho”. Hata disolsoli berarti adong hamubaon ni roha manang pertobatan. Ido asa didok Tuhan Jesus di ayat 31 “ tagonan do halak sijalo beo dohot boru najahat bongot tu harajaon ni Debata”. Angka pardosa do nasida, alai nasida do namanjalo jamita ni si Johannes asa marhamubaon ni roha, alai anggo angka siboto surat dohot angka sinta ni Malim dang dijalo jala dang dihaporseai nasida, suang songoni nang dohot jamita ni Tuhan Jesus.

· Asa godang do jolma na malo manghatahon Hata ni Debata, dohot namanghatindanghon haporseaonna, alai dang saulaon ibana dohot nahinatahonna. Adong do namandok naung mangolu/saor Jesus dingoluna, alai dang dipatuduhon parbue naung mian Jesus dingoluna, ido asa didok di 1Yoh 1:6  “ Molo tadok, naung saor hita tu Ibana, huhut taulahon na holom, pargabus do hita, ndang siula hasintongan hita”. Ndang cukkup holan hata alai ingkon dohot ma parniulaan, ndada ulaon nadenggan mambahen hita malua alai haporseaon do, alai haporseaon ipe tarida do sian parbuena. Molo Jesus hasintongan, attong ingkon mangolu ma hita di hasintongan, jala angka namanghaporseai Tuhan Jesus, jaloonna do Tondi ni Debata, asa manang ise naung manjalo tondi I, mamparbuehon parbue ni Tondi ( Galatia 5:22) jala gabe anak hatiuron (Efesus 5).

· Jabatan gerejawi pe dang boi mambahen hita bongot tu harajaon ni Debata, Alana angka siboto surat dohot akka sintua ni malim pe jotjot do dipinsang Tuhan Jesus ala holan mangasahon hamaloonna manghatahon na tarsurat I dang seimbang dohot ulaonna. Alai angka ise do nabongot ? angka na olo ro tu Tuhan Jesus, manghaporseai Ibana jala namangulahon lomo ni rohaNa.  Tarlumobi tahe Angka jolma nadibagasan dosa,na ro manolsoli rohana jala mulak/bertobat tu Haporseaon na sintong dohot tu ulaon hatigoran.

· Taboto do ia haluaon napinatupa ni Debata silehonlehon doi tu portibi on, tu ganup na olo manjangkon Jesus gabe Tuhan di ngoluna. Alai ala sai tong dope hita dibagasan dosa i (Rom 3 : 23), ido asa dipangidohon Debata sian hita hamubaon ni roha/pertobatan, angka na olo manolsoli rohana ido nahinalomohon ni Debata. Attong, naeng ma hita saluhutna menyadari godang ni hahuranganta di jolo ni Debata, jala olo ma hita dipaias sian dosa asa unang sarombang be hita dohot portibi on.

 

III. Antong, Taulahon Ma Lomo Ni Roha Ni Debata

· Dang dihalomohon Debata hamatean ni parjahat I alai mulak ma nian parjahat I tumadingkon dalanna asa mangolu ibana. Nang hita pe, ndang adong namanghalomohon asa mago hita sian adopan ni Debata. Alani I ma, di hita saluhutna Huria ni Debata, unang be holan marguru tu portibion hita nang dohot angka ulaonta, unang ma holan lomo ni rohanta taulahon, alai dia ma lomo ni roha ni Debata ido narumingkot

 

· Di 1 Yoh 2:17  didok “ Jala na laho salpu do portibi on rap dohot na pinarhagiotna; alai na mian ro di salelenglelengna do na mangulahon lomo ni roha ni Debata.” Attong dang adong sipangasahononta di portibi on, ia so holan Debata marhite Tuhan Jesus. Ai salpu do hape hasiangan on, alai angka siula lomo ni roha ni Debata, ido namian ro disalelengnilelengna jala na bongot tu harajaon ni Debata. Amen