Patujolo
Huria ni Tuhanta na nihaholongan dibagasan Goar ni Tuhan Jesus Kristus, somal do hita manggokhon angka dongan saulaon paradatan tarlumobi ma tahe tuangka dongan sisolhotta, ale-ale nataholongi, dongan tubu, dongan magodang, paradongan dohot angka lan naasing ditingki marulaon hita disada pesta natapatupa. Jala hirim do rohanta disaluhut gokkon i nian mangkorhon alusna, marhite haroro nasida tu ulaon pesta i. Nang songoni do dibagasan turpuk on, disuarahon do tu hita marhite:
TEMA : Alusi ma Jou-jou ni Tuhan I
1. Unang tois roham
2. Ai nunga diparade Debata di hita natama
3. Alani Alusi ma Jou-jou ni Tuhan I.
1. Unang Tois Roham
Molo tapaihut ihut disada sada ulaon sai adong do pandohan, jou jou sipaimaon, gokhon si alusan, na marlapatan sian hata on Sude do hita paimahon joujou jala sude ingkon mangalusi gokhon i, napataridahon haradeon dohot pangoloion, hobas manang so hobas songon na masa diturpuk on. Di bahen Tuhan Jesus do sada umpama tu angka sisean dohot angka natorop satiha i taringot tu parunjunan mangeahi harajaon Banua ginjang. Ngolu na manonontong ro di saleleng ni lelengna; didok di ayat 3: jadi di suru ma angka naposona, manjou angka na ginokhonNa hian tu pesta i, hape dang olo nasida ro, aya 4 : di ulahi ma disuruma naposona na asing ninna ma , paboa hamu ma tu angka naung ginokhon hian, nunga huparade panganon pesta I, nunga hupabutong angka horbo dohot lombu, nunga rade saluhut, ipe ro ma hamu tu pesta I, sian ayat on marsak do roha ni raja i ala so adong na ro mangalusi gokhon naung pinadalanna, songon na masa di hatiha hajolmaon, maras do roha ni saluhut molo so adong na ro mangalusi gokhon naung pinadalanna, hape nunga diparade saluhut angka na porlu tu ulaon I, ai holan namarsidalian angka na ginokhon i, adong na mandua hali sian tois ni rohana, adong tu angka ulaonna, adong tu partigatigaanna.
Angka Ise do i namartois ni roha i manolak gokhon ni raja i ? On ma gombaran ni halak Yahudi namenolak gokhon dohot jou-jou ni Debata. Aha maksud ni manurbu hutanasida ? on ma baga-baga taringot tu Kehancuran Yerusalem (Mateus 22: 7 bdn. Lukas 19 : 41 -44), angka ise do nadipusa angka naginokkon i ? Ima Gombaran ni angka panurirang ni Debata.
Aha do akibatna na ditolak gokhon i ? Gokhon i dipasahat ma angka na asing diluar ni halak Yahudi na olo manjangkon jala mangalusi Gokhon i. Angka ise ma i ? ima hita na diluar kalangan halak Yahudi.
Aha do Gokkon i ? ima Injil manang barita silas ni roha, barita haluaon, manang tawaran lao tu harajaon ni Debata napisahatna tu hita asa marhite i hita mandapot silasniroha.
Tois ni roha ni angka na ginokkon pataridahon sikap na apatis (tidak mau tahu), mantak ginjang ni roha, cuek di jou-jou manang gokhon ni raja i. Jala on ma pataridahon gombaran ni pemberontakan maradophon raja i, ala so olo ro tu ulaon i bahkan tarida do i marhite na dipusa angka naginongkon i, naposo ni raja i nalao manjou nasida tu ulaon i.
Marhite sikap tois ni raha ni nasida, patubuhon 2 hal:
1. Sega hubungan ni raja i maradophon nasida
2. Dang adong kesempatan gabe parsidohot di ulaon i
Huria ni Tuhanta na ni hahaholongan dibagasan goar ni Tuhan Jesus Kristus, songoni jot-jot namasa dingolunta siganup ari, dang tinggil hita mangangihon joujou ni Debata dingolunta, Ganup ari Debata manjou hita marhite roha na elek, laho manggokhon hita, asa parsidohot hita mandai denggan Basa ni Debata na pinatupana tu hita. Alai jot-jot do hita tidak mau tahu, jala dang peka hita dijou-jou-Na I, digokhon-Na I, alani angka hinauli portibion manosak ngolunta, alani angka ulaon mambaen hita lupa, alani angka mammon i hita cuek, alani naringkot dingoluon mambaen hita dang peduli di soara ni Debata namanjou hita, marhite naposona, namambaritahon hata ni Debata, Barita silas niroha, barita haluaon (Injil) asa mandapot hita silas ni roha.
Jala sikap sisongon on do jot-jot mambaen hita dao sian Debata, gabe sega hubunganta maradophon Debata, sehingga hita dang adong kesempatan na gabe parsidohot mandai silasni roha na pinaradena tu hita. Malah gabe uhuman namarimpot-impot do na gabe jambarta hinorhon ni tois ni rohanta i, ala so olo hita hobas, rade, mangalusi jou-jou ni Debata di ngolunta.
2. Ai Nunga Diparade Debata Di Hita Natama
Huria ni Tuhanta dibagasan Goar ni Tuhan Jesus Kristus, Porlu asa tasadari songondia do cara ni Debata manjou hita, manggokhon hita. Sude do hita dijou, manang ise pe asa parsidohot hita di ulaon ni Harajaon ni Debata. Tabereng ma diturpuk on, tung pe tois roha ni halak naparjolo na ginokhon i (Yahudi), marhite nasida na so olo ro tu ulaon i, alai tetap do Debata manjou angka jolma na olo ro tu ulaon pesta i (Diluar Kalangan Yahudi). Tarida do i marhite ay.9 namandok : Onpe, laho ma hamu tuangka dalan balobung, arahon hamu ma tu haroan on nasa nadapot hamu. On gombaran do on dihita saluhut na, bahwasana hita nanidokna disi, naso tahu parsidohot hian hita diulaon i, alai gabe boe hita mandapot kesempatan lao bongot tu ulaon i, marhite olo hita mangalusi jou-jou ni Debata. Alai porlu tangkas taboto, dimangalusi jou-jou i, ingkon adong haradeon ni diri dohot persiapan na matang huhut namangkaringkothon ulaon pesta i, dang sasongon halak naso marpangkean pesta songon na nidok ni ay. 11-12 nangkaning i, naso hobas, naso rade, na so serius mangharingkothon ulaon pesta i.
Gombaran do i dihita saluhutna, godang na jinou Debata, alai saotik tarpillit. Gok do jolma ro marminggu , alai dang diharingkothon hata ni Debata, dang diharingkothon ulaon ni Debata, Dang dihangoluhon Hata I, dang hobas dingoluna marparange ngolu nadenggan, dang dihangoluhon hata ni Debata di ngoluna, menganggap sebatas formalitas bukan sebagai identistas dan loyalitas ni ngoluna di ulaon partondi on i namarpangkorhon tu hangoluan sogot. Artina, Godang do halak marminggu, ala marminggu dongan, godang do dang marminggu halak ala si anu martingki dohot angka lan naasing tubu paradigma pola pikir na sala. Sehingga dang ala ni ringkot ni rohana hape laho mandohoti ulaon partondion i. Jala unang dirimpu rohanta molo nga marminggu hita nga parsidohot hita harajaon ni Debata, jala tegas do dohonon, naparsidohot ima diangka na hobas, manjalo, mangauhon, namangkaringkoti, mangkasiholi ulaon harajon ni Debata di ngoluna dohot na olo mangalusi jou-jou ni Debata marhite soara ni Barita na uli. Ido umbahen, godang natarjou, alai saotik natarpillit.
Huria ni Tuhanta nanihaholongan dibagasan goar ni Tuhan Jesus Kristus, diangka naso dohot, luangan hita diharajaon ni Debata, alai diangka na dohot, dapotan jala nampusa hita diharajaon ni Debata. Unang unang hita masuk tu bilangan natarjou alai dang tarpillit, jala naeng ma nian tarjou jala tarpillit, unang ma angkap sepele dipanjouon ni Debata dingolunta, jala ingkon mangkaringkothon jala mangkasiholi ima ulaon Harajaon Banua Ginjang asa parsidohot hita jala nampunasa diharajaon banua ginjang i. Ai nunga diparade Debata dihita natama, asa mandai hita Denggan Basa-Na. Mangkalashon sude disaluhut ulaon napinatupana, jala arga hita diadopan-Na, las roha-Na marhite parsidohot hita di Harajaon ni Debata namanontong i.
Sude do hirim nian asa mandai denggan Basa ni Debata napinarade na tu hita. Pos do roha parjambar do hita muse asal ma olo hita mangalusi jou-jou ni Debata namarsoara tu hita, asa tinggil hita, hobas, sihol naeng mandohoti jou-jou- Nai.
Diulahi mansai gomos, asa tapareahi ma ngolu na manontong i, sude hita di jou Debata, alai molo tabereng do haradeon ni hita saluhut, godang do naso tangkas manghilalahon joujou I tu ngoluna, umbahen didok di ayat 14 dohot di Mateus 20 : 16 “ Lan do na tarjou, alai otik do natarpillit” disosohon Ende di 376,3 : Unang tatoishon Jesus I, ungkap ma jangkon aleale mi, ungkap ma, namanesa dosami, namamboan dame I namanogu tondimi tu surgo i: di dok di Rom 8;14+17, ai nasa na tinogihon ni Tondi ni Debata, angka I do anak ni Debata, alai molo anak hita, dohot ima hita panean di Kristus I, molo tung dongana hita disitaonon, gabe donganna hita sogot nang dihasangapon
3. Alani Alusi ma Jou-jou ni Tuhan I
No comments:
Post a Comment