JAMITA / EVANGELIUM: HAMUBAON NI ROHA NA SINTONG (MATEUS 18 : 1 - 20) || BAHASA BATAK ||

Jamita/Evangelium: Mateus 18 : 1–20

Minggu, 06 September 2020

(Penulis: Pdt. Lamris Malau, S.Th)

Patujolo:

Di hajolmaon mamereng sasahalak sai ngolu parduru do jotjot jumololo dipamanat, lumobi ma mamereng parsitutuon di ngolu parhuriaon ni marsasahalak. Ala ni nunga lam miduk nuaeng na gabe mulak tu pudi haporseaonna bahkan na gabe manadingkon haporseaonna; sahalak ruas ndang be satia di haporseaon, haringgasonna nang di angka ulaon parhuriaon lobi tahe dohot parhalado gabe manadingkon ulaon/tohonanna ala motifasina mangihuthon Tuhan Jesus holan mangharingkothon ngolu parduru/pardagingon sambing; ala nii di Minggunta sadari on dijouhon marhite jamita on haringkothon ma:

 

Thema : Hamubaon ni roha na sintong !

 

I. Songon Parrohaon ni dakdanak

· Nung nian leleng sisean i rap dohot Jesus, alai sai adong do sian tongatonga nasida na so sintong pangantusionna taringot tu Harajaon ni Debata nang din a laho mangihuthon Tuhan Jesus. Ndang tulus rohana mangalehon ngoluna tu Haraon ni Debata.

· Jotjot do gabe patubu pargasipan, marasingasing pandapot manghorhon parsualon songon di turpuk on : ise naumbalga di Harajaon banuaginjang? Ise na jumonok? Ise gabe haholongan-Na?

· Dipangke Tuhan Jesus do angka umpama laho mangalusi angka sungkunsungkun ni sisean i nang angka na torop pe; tujuan-Na asa jolo dirajumi be tu dirina hombar tu parange dohot ulaonna be.

· Marhite angka sungkunsungkun i, adong dirajumi sisean i dirina na sumangap, naumbalga, nasumolhot tu Jesus, naumpistar, narumingkot. Dietong nasida sai adong hasurunganna di adopan ni Jesus. Sai dihirim nasida adong ma alus ni Jesus paboahon ise sian nasida naumbalga?

· Hape dao do sian pangkirimon nasida alus ni Tuhan Jesus. Di jou Jesus do sahalak dakdanak jala dipajongjong ditongatonga nasida laos didok tu nasida : molo so mulak rohamu, gabe songon dakdanak  tung na so bongot hamu tu harajaon banua ginjang I (ay.3)

· Aha do na naeng pinatuduhon jala siparsiajaran sian sahalak dakdanak? Sahalak dakdanak, i ma na so haru godang dope pangantusion jala parroha na bulus, jujur. Laos didok Jesus : manang ise na manjangkon dakdanak on marhite goar-Hu, Ahu do jinangkonna disi (ay.5), lapatanna hadirion ni Tuhan Jesus, rupa dohot pangalaho-Na adong di angka dakdanak.

· Manang ise na naeng bongot tu harajaon banua ginjang, ndada ala ni pangkat/jabatan manang status social, hapistaran, haburjuon manang pambahenan. Ia Harajaon banua ginjang, i ma silehonlehon ni Debata, silehonlehon na so pola situhoron manang sitobuson marhite angka pambahenan na dengga, usaha dohot parulan. Alai marhitehite Tuhan Jesus Kristus gabe haluaonta.

· Alai parroha na bulus songon haporseaon ni dakdanak haporseaonta di Tuhan Jesus angka i do na tau di harajaon banua ginjang i.

 

II. Unang patubuhon pargasipan

· Diuduti Tuhan Jesus do mangajari angka sisean i, patorangkon roha na bulus songon dakdanak, i ma bahaya ni na patubu pargasipan/batu partuktuhan. Batu partuktuhan, i ma : pangalaho na manghorhon dongan manang jolma na asing madabu tu bagasan dosa manang marpangalaho na humurang.

· Dipatudos Tuhan Jesus do dokdok ni uhum tu halak na mambahen pargasipan hombar tu adat hasomalan ni halak Jahudi. Didok molo digasipi tanganmu manang patmu ho, gotap jala bolongkon. Tajom do pandohan on, alai molo pinamanat, sasahalak na singkop tanganna dohot patna manghorhon madabu tu dosa, dengganan do ndang martangan dohot marpat alai bongot tu harajaon banuaginjang i asa singkop alai masuk tu narokko.

· Pandohan ni Tuhan Jesus on, paandarhon tu hita hinaarga ni harajaon banua ginjang i, ndang jumpang hita i ianggo tung ala ni gogo dohot ala ni pambahenan, alai silehonlehon ni Debata na mansai arga situtu do i.

 

III. Mangolu di bagasan hamubaon ni roha na sintong

· Poda Haporseaon Luther/Confessio Augustana Artikel XII taringot tu Hamubaon ni roha di podahon do : dua do niigil  ni hamubaon ni roha, i ma :

1. Biar ni roha na mambukbahi taroktok marhitehite parbinotoan di dosa i.

2. Ia haporseaon na tinubuhon ni Barita Nauli (lapatan ni hata haporseaon ponggol III) di hasesaan ni dosa, jala molo dihaporseai, tubu hasesaan ni dosa jala tarapul panggora ni roha huhut malua ma sian hasusaan ni roha tinubuhon ni dosa i.

· Hamubaon ni roha na sintong i ma na marpangoloion naimbaru (Confessio Augustana Artikel VI) na mandok ia haporseaon i ingkon marparbuehon parbue na denggan do. Hamubaon ni roha tu haimbaruon di ngolu siganup ari, pangalaho dohot parsaoran na rosu dohot Debata marhite Hata-Na jala lam sumurung di ulaon ni Tuhan I (I Korint 15,58). Amen !